Thursday, 13 July 2017

కర్ణాటక కోవెల యాత్ర - ముగింపు

యాత్ర అంతా సవ్యం గానే జరిగినా చిన్న అసంతృప్తి.ఎక్కువ సమయం కేటాయించాల్సిన ప్రదేశాలకు తక్కువ సమయం,తక్కువ సమయం కేటాయించాల్సిన ప్రదేశాలకు ఎక్కువ సమయం... బేలూర్,తిరుగు ప్రయాణం రోజు చూడాల్సిరావటం,చాలా తక్కువ సమయం ఇవ్వటం వల్ల-హడావిడిగా పరుగులుపెట్టి...సరిగా చూడలేకపోయాము.హొయసల రాజు విష్ణువర్ధనుడు  కట్టించిన చెన్నకేశవ /విజయనారాయణ ఆలయం శిల్పకళ అద్భుతం.   

ఈ రాజ గోపురం తర్వాతి కాలం లో విజయనగర రాజులు కట్టించారట 

గరుడ ధ్వజ స్థంభం 












Wednesday, 5 July 2017

శనివార్ వాడా

ఒకప్పటి పేష్వాల నివాసం. ఇప్పుడు శిధిలమై పునాదులు మాత్రమే మిగిలాయి.చరిత్ర అంటే ఇష్టపడే వాళ్ళు ,ఒకసారి సందర్శించొచ్చు.ప్రతి ఒక్క చోట బోర్డులు ఉండటం వల్ల ఒకప్పుడు అక్కడ సభ జరిగేది,ఫలానా వారు నివాసం ఉన్నారు.ఇక్కడ కూర్చొని నృత్య ప్రదర్శనలు చూసేవారు అని ఊహించుకోవాల్సిందే. 1730 లో ఒక శనివారం రోజు పేష్వా బాజీరావు 1 ఈ వాడా కి శంఖుస్థాపన చేశారు.1732 లో పూర్తయ్యింది.శనివారం రోజున మొదలు పెట్టటం వల్ల ,దీనికి శనివార్ వాడా అని పేరు.ఈ కోటలో సుమారు వెయ్యి మంది నివసించేవారట.1828 లో జరిగిన అగ్నిప్రమాదం తో కోట మొత్తం ధ్వంసం అయ్యింది.

           
ప్రవేశ ద్వారం 


       ఒకప్పటి చరిత్ర కి ఆనవాళ్లు 



ఫౌంటెన్
మంత్రుల సమావేశం జరిగే ప్రదేశం


దీనికి ఎదురుగా రంగమహల్ ఉండేదట. ఇక్కడ కూర్చొని నృత్యం చూసేవారట 




Sunday, 2 July 2017

కాపీ

ఈగ ,లేదా ఇంకోటేదో సినిమా చూడగానే ఇది ఫలానా సినిమా కి కాపీ ,కనీసం క్రెడిట్స్ కూడా ఇవ్వలేదు ,కాపీ కాదు స్ఫూర్తి పొందారు,వగైరా ... ఇలాంటి మాటలు తరచూ వింటూనే ఉంటాము  😊. అయితే మన తెలుగు సినిమాల నుంచి కూడా స్ఫూర్తి పొందేవారు లేదా కాపీ కొట్టేవారు ఉన్నారు. లేదా వారికే స్వయం గా అలాంటి కథ తట్టి ఉండొచ్చు.చెప్పలేం.ఇవాళ " The parent trap" అనే సినిమా చూసాను.ఏవో కొద్దీ మార్పులతో అచ్ఛం లేత మనసులు అనే సినిమా లానే ఉంది.కాకపొతే తెలుగు సినిమా నేను పుట్టకముందు వచ్చినది.ఇంగ్లిష్ సినిమా 1998లో తీసినది/విడుదల.రెండు సినిమాల లింక్ ఇక్కడ ఇస్తున్నాను.

The parent trap



Letha Manasulu

Monday, 19 June 2017

ముక్తేశ్వర్ ధామ్

ద్వాపర యుగం లో,పాండవుల వనవాసపు 12 వ సంవత్సరం లో తలదాచుకున్న గుహలు - ఈ ముక్తేశ్వర్ ధామ్.ఇక్కడ పాండవులు సుమారు ఒక ఆరు మాసాలు ఉన్నారని నమ్మకం . దీని గురించి ప్రస్తావన స్కంధ పురాణంలో ఉందంట.పెద్ద కొండ, పక్కనే రావి నది ప్రవహిస్తూ చూడటానికి ఎంతో ఆహ్లాదం గా ఉంది.పాండవులు నివాసం ఉండటానికి ఈ కొండలో 5 గుహలు తొలిచారంట.ప్రస్తుతం మూడు గుహలు మాత్రమే చూడటానికి వీలుగా ఉన్నాయి.

          
గుహల వద్దకు వెళ్ళటానికి మెట్ల దారి 


రావి నది 




గుహ అంతర్భాగం 

మూడవ గుహ లోని పైకప్పు ,ఇక్కడ పాండవులు మెడిటేషన్ చేసే వారు అని అక్కడ పూజారి చెప్పారు 




మెట్ల పక్కనే ఉన్న కొండ , నాకు శివుని రూపం కనిపించింది. మీకూ కనిపిస్తుందేమో చూడండి :)


మూడవ గుహ కి దారి 



Thursday, 8 June 2017

అందమైన రైల్వే స్టేషన్ - ఉదయపూర్

రైల్వే స్టేషన్ వచ్చింది,దిగండి అన్నది విని   క్షణం నోట మాట రాలేదు.చాలా సేపటివరకు నమ్మకం కలగలేదు.ప్రవేశ ద్వారానికి ఎదురుగా రోడ్డు కవతల రాణా ప్రతాప్ విగ్రహం.ప్రవేశ ద్వారానికి రెండు పక్కల గోడల పైన,టెర్రకోట బొమ్మలు.స్టేషన్ లోపల గోడల పైన,పై కప్పు  మీద పెయింటింగ్ లు      --- చాలా అందం గా ఉంది . కొన్ని ఫోటో లు మీ కోసం  :)






స్టేషన్ లోపల ... 











Wednesday, 25 January 2017

కర్ణాటక కోవెల యాత్ర - కుంభాశి,కలశ

యాత్ర లో చివరి రోజు బేలూరు ... అక్కడ్నుంచి డైరెక్ట్ బెంగళూరు రైల్వే స్టేషన్ ... మరుసటి రోజు ప్రొద్దున్నే ఇంటికి చేరాము.సమయాభావం వల్ల లిస్ట్ లో ఉన్న హాలేబీడు,శ్రావణ బెళగొళ చూడలేకపోయాము.వాటికి కాంపెన్సేషన్ అన్నట్టు లిస్ట్ లో లేని ఆనిగెడ్డ వినాయకుడుని,కలశ లోని కలసేశ్వరుడుని దర్శించుకున్నాము.

ఏడు ముక్తిస్థలాల్లో,ఆనిగెడ్డ  ఒకటి.ఆనిగెడ్డ కు ఇంకో పేరు కుంభాశి.అగస్త్య ముని యజ్ఞం చేస్తుండగా కుంభాసురుడు అనే రాక్షసుడు ఆటంకం కలిగిస్తుంటే వినాయకుడు,భీముని కి కుంభాసురుడు ని చంపటానికి ఒక ఖడ్గం ఇచ్చ్చారుట.ఆ ఖడ్గంతో భీముడు కుంభాసురుడు ని చంపి యజ్ఞానికి ఎటువంటి ఆటంకాలు లేకుండా పూర్తయ్యేలా చేసాడు. అందువల్ల కుంభాశి అనే పేరు ...  ఇక్కడ స్వామికి ,భక్తులు వక్కపూలు సమర్పిస్తున్నారు. ప్రసాదంగా వక్క పూలు ఇస్తే ,తినొచ్చా - తినకూడదా ఏమి చెయ్యాలి అనుకుంటూ కొంతసేపు చర్చించుకుని ఆఖరికి తిన్నాము. టేస్ట్ బాగానే ఉంది- కొంచం పుల్లగా.మేము తినటం పూర్తయ్యాక చూసాము.స్థానికులు అనుకుంట,వక్కపూలుతలలోపెట్టుకున్నారు.మనం తెలియక తినేసాము,తినటానికి ఫస్ట్ అనుకుంటూ నవ్వుకున్నాము.


(ఫోటో గూగుల్ నుంచి )


వక్కపూలు (శృంగేరీ లో తీసిన ఫోటో )


స్కంధ పురాణం,తుంగభద్ర కాండం లో ,కలశ గురించి ప్రస్తావన ఉందట.దీనిని దక్షిణ కాశీ గా భావిస్తారు.






   

Tuesday, 17 January 2017

కర్ణాటక కోవెల యాత్ర - శృంగేరి

అష్టాదశ శక్తి పీఠాలలో కాశ్మీర్ లోని సరస్వతీ పీఠం ఒకటి.మా టూర్ ఆపరేటర్ చెప్పటం,ఇప్పుడు కాశ్మీర్లో శక్తి పీఠం లేదు అని.అక్కడ అమ్మవారికి పూజలు సరిగా చెయ్యటం లేదని,శంకరాచార్యుల వారు,అమ్మవారి విగ్రహాన్ని తీసుకొచ్చి శృంగేరిలో ప్రతిష్టించారని. నిజం ఎంతో తెలియదు.తుంగా నది ఒడ్డున ఈ గుడి ఉంది.అమ్మవారి గుడి తో పాటు విద్యాశంకర గుడి కూడా ఉంది.







శృంగేరి లో అమ్మవారిని దర్శించుకుని,ప్రస్తుత శృంగేరి పీఠాధిపతి అక్కడే ఉన్నారని తెలిసి , ఆయనను  కూడా చూసి ఆశీర్వాదం తీసుకుని వచ్చాము.భోజనం పీఠం లోనే కానిచ్చి హోరనాడు వెళ్ళాము.ఇక్కడ అన్నపూర్ణ అమ్మవారి గుడి ఉంది.చుట్టూ కొండలు,ఎటు చూసినా పచ్చదనం ... చాలా బాగుంది. 



     



Thursday, 5 January 2017

కర్ణాటక కోవెల యాత్ర - కొల్లూరు

మురుడేశ్వర్ నుంచి ఉడుపి జిల్లాలోని కొల్లూరు మూకాంబికా గుడికి వెళ్ళాము.పురాణాల ప్రకారం , పూర్వం కౌమాసుర  అనే రాక్షసుడు శివుడు ఇచ్చిన శక్తుల అహంకారం తో దేవతలను వేధిస్తూ ఉండేవాడు.కౌమాసుర,తనకు చావు లేకుండా వరం పొందేందుకు ఘోర తపస్సు చేసాడు. శివుడు ప్రత్యక్షమయ్యి,ఏమి వరం కావాలో కోరుకోమన్నాడు.వరం పొందితే రాగల  ఆపదను పసిగట్టిన సరస్వతీ దేవి అతని వాక్కును బంధించగా వరం అడగలేకపోతాడు.అప్పట్నుంచి అతనికి మూకాసురుడు అనే పేరు వచ్చింది. మూకాసురుడు ని చంపటానికి ముగ్గురు అమ్మలు (లక్ష్మి,సరస్వతి,పార్వతి)ఒక్కటయ్యి మూకాంబికా అవతారమెత్తి సంహరిస్తారు.చారిత్రిక ఆధారాల ప్రకారం ఈ గుడి 1200 సంవత్సరాల క్రితం నిర్మించబడింది.



  అమ్మవారి రధం 


గుడి లోపల, ఎంట్రన్స్ కి దగ్గర 


ఇంకో కథనం ఏమిటంటే, శంకరాచార్యులు - సరస్వతి అమ్మవారిని భక్తి తో కొలవగా, అమ్మవారు ప్రసన్నమయ్యి ప్రత్యక్షమయ్యారుట.అప్పుడు శంకరాచార్యుల వారు కేరళ లో ఆవిడకంటూ ఒక్క గుడి కూడా లేదని ,అందుకని తనతో కేరళ రమ్మని కోరారుట.దానికి అమ్మవారు అంగీకరించి ఒక షరతు విధించారట.అదేమిటంటే,గమ్యం చేరేవరకు వెనుదిరిగి చూడకూడదు.అలా చేస్తే ఉన్న చోటే నిలిచి పోతానని.దానికి అంగీకరించి బయలుదేరారు.తనతో పాటే వస్తున్న అమ్మవారి కాళీ మువ్వల శబ్దం- ఒకచోట  ఆగిపోయేసరికి  శంకరాచార్యులు వెనుదిరిగి చూడటం తో అమ్మవారు అక్కడే ఆగిపోయారు. శంకరాచార్యుల వారు పదే పదే క్షమించమని వేడుకోవటంతో,కేరళ లోని చొట్టనిక్కర గుడి లో ఉదయం పూట ,మధ్యాహ్నం మూకాంబిక గుడిలో ఉంటానని చెప్పారట. 

మేము కొల్లూరు వెళ్ళేప్పటికి మధ్యాహ్నం అయ్యింది.ఆ కథనం నిజమయితే - అమ్మవారు వచ్చే సమయానికి మేము వెళ్లామన్న మాట 😄       

దర్శనం చేసుకుని,సాయంకాలానికి మళ్ళీ ఉడుపి చేరుకున్నాము.మళ్ళీ కృష్ణుడి గుడికి వెళ్లి , మేము కూడా దీపాలు వెలిగించి వచ్చాము. కొంచం షాపింగ్ కూడా   😄